《球迷世界》英超 Week 2 賽前預測! (週日賽事)


今日返咗成日工,返到屋企又繼續為大家預測下聽日兩場重大賽事!執筆之時,叫做估中咗愛記贏波,不過估唔到係一場大勝。似乎愛記今季成績可期(J洛大放異彩)!

車路士 VS 利物浦

短評:本週英超最矚目賽事!車路士今季洗咗差唔多200 M去買新球員,不過有不少新球員都傷出同埋未達到狀態,似乎都要多兩三個禮拜先可以睇到full team嘅車路士。

近況方面,兩隊都不可過份樂觀。車路士上場雖然贏咗白禮頓,不過從表現上睇嚟,林柏特都仲需要下一番功夫。而利物浦方面,上場面對升班馬列斯聯竟然失左三球波,實在令人憂慮利物浦嘅後防係唔係有啲隱患。

利物浦嘅球員大致健康,除咗中場韋拿杜姆可能未能上場之外,大致上都可以full team上陣。人腳方面,如果逐個位秤嘅話,利物浦都稍稍優勝,而且車路士中堅及龍門位置可能表現有隱憂。

Man to Watch: Salah

賽果預測:2 比 3 (利物浦勝)

紐卡素 VS 白禮頓

短評:紐卡素上場比預期輕鬆地贏左韋斯咸,新收購嘅中場軒迪歷同高價收購(20 M對紐卡素來講已經好多錢)嘅前鋒哥林威爾遜一落場已經有好表現,各自有一個入球,期望今場繼續會對白禮頓造成威脅。雖然正選門將杜巴夫卡仍然傷出,達路嘅把關能力令人有少少擔憂,不過白禮頓未必能夠比到紐卡素後防好大威脅。兩對波係週中嘅聯賽杯都有贏波,而且白禮頓更加贏四比零一洗頹氣,有助提升士氣。

白禮頓中場拉蘭拿仍然需要體測去決定佢出唔出到場,如果有佢在陣,可以大大提升球隊嘅用波同埋創造力。兩對球隊嘅實力都好接近,不過以紐卡素嘅實力稍勝一籌。

Man to Watch: Callum Wilson

賽果預測:2 比 1 (紐卡素勝)