《球迷世界》英超 Week 2 賽前預測! (週六賽事)

上週 Week 1 Prediction 結果

西布朗 vs 李斯特城
賽果預測:1 比 2 (李斯特城勝)
結果:0 比 3

熱刺 vs 愛華頓
賽果預測:1 比 1 
結果:0 比 1

白禮頓 vs 車路士
賽果預測:0 比 2  (車路士勝)  
結果:1 比 3

愛華頓 vs 西布朗

短評:愛華頓上場表現優異,成功喺熱刺身上全取3分。占士洛迪古斯雖然速度麻麻,但係技術一流,多次傳出致命傳球,盡顯功架。開頭仲擔心佢會有適應英超問題,但係佢上場踢足90分鐘,似乎唔係有太大問題。愛華頓兩位新防中杜古希同阿倫表現硬正,西布朗要攻入愛華頓中後場真係要諗下計仔。

西布朗上場對李斯特城都有啲攻勢做到,但係始終人腳未到英超水平。前車路士後衛伊雲洛域嘅加盟有助提升球隊實力,起碼可以將英超經驗帶俾其他隊友。西布朗都應該會係守住先,希望可以喺呢一場裏面攞到分,不過面對愛華頓都唔係咁容易。

賽果預測:2 比 0 (愛華頓勝)

曼聯 vs 水晶宮

短評:曼聯簽入進攻中場雲迪碧克,擅於傳球及向前推進,加上傳射能力不俗,有助增強曼聯嘅中場實力。(究竟係咪用佢嚟頂替普巴嘅呢?)

水晶宮上場數據上不及修咸頓,但係最後小勝一比零,有助提升水晶宮嘅士氣。加上早前喺車路士續借到前鋒巴舒亞伊,可能係水晶宮進攻裏面嘅一粒重要棋子。但係只要逐個位去秤下兩隊嘅球員,都會知道曼聯平均球員實力都高過晒水晶宮,完全冇得鬥。水晶宮呢場望就望攞到一份,不過呢個夢想似乎只會係一個泡影。

賽果預測:2 比 0 (曼聯勝)

阿仙奴 vs 韋斯咸

短評:阿仙奴前鋒奧巴美揚簽長約,有助提升球隊士氣。(雖然我都唔係好明點解奧巴美揚仲會留喺亞仙奴,去到三張野嘅年紀正常都會希望可以衝擊下獎盃,最少都有歐聯踢啊!不過佢話阿迪達的一句「成為傳奇」深深打動到佢)上場對富咸嘅比賽裏面,阿仙奴無論數據及表現方面都完勝富咸,新加盟嘅韋利安更加成為 Man Of The Match,的確喺進攻方面更有看頭。

韋斯咸上場輸比紐卡素二比零,而且仲係輸得幾清脆添。最大問題係中場創造力不足,點樣去入波都係好大嘅問題。

賽果預測:2 比 0  (阿仙奴勝)