《球迷世界》英超 Week 3 賽前預測! (週六賽事)

上週week 2 Prediction 結果

愛華頓 vs 西布朗
賽果預測:2 比 0 (愛華頓勝)
結果:5 比 2

曼聯 vs 水晶宮
賽果預測:2 比 0 (曼聯勝) 
結果:1 比 3

阿仙奴 vs 韋斯咸
賽果預測:2 比 0  (阿仙奴勝)  
結果:2 比 1

車路士 VS 利物浦
賽果預測:2 比 3 (利物浦勝)  
結果:0 比 2

紐卡素 VS 白禮頓
賽果預測:2 比 1 (紐卡素勝)  
結果:0 比 3

白禮頓 VS 曼聯

短評: 主場嘅白禮頓近況正盛,各級賽事近三場都以兩球以上之差取勝。上場英超對實力相近嘅紐卡素,令編者大跌眼鏡,竟以三比零之差大勝,令我呢個紐記迷越睇越傷心。喺進攻表現方面,白禮頓喺上場英超完全控制晒進攻節奏,邊路嘅林迪(Tariq Lamptey)嘅速度同埋突破能力更加係眼前一亮。如果佢可以喺賽前嘅體測成功過關,將會對曼聯嘅邊線造成一定壓力。戰術方面,對住前「BIG 4」球隊,未必採主守踢法,反會踢開放波。

曼聯喺周中嘅聯賽杯贏咗英冠仔盧頓,叫做提振少少士氣。不過上場對水晶宮,一度落後到零比二,相信除咗令筆者估都估唔到之外,會令好多曼聯擁躉喊晒口。上場佢哋嘅中場表現勁差,普巴成日傳失波,B費亦都冇乜表現,亦有人質疑點解馬迪爾繼續打中鋒位。上場編者都已經估到,曼聯嘅弱點就係禁區裏面嗰三個人,如果白禮頓可以好好把握,相信應該可以有波入,而領隊蘇斯克查應該冇乜方法去扭轉而家曼聯嘅弱勢。如果蘇B肯派遣進攻中場雲迪碧克正選上陣,都有啲機會取勝,否則摸和機會較大。

Man to Watch:van de Beek
賽果預測:1 比 1

水晶宮 VS 愛華頓

短評: 近況方面,水晶宮上場爆大冷贏曼聯三比一,取得英超兩連勝。愛華頓都唔弱,先贏熱刺,第二場更大勝西布朗五比二,近況似乎更佳。

水晶宮除咗沙夏之外,冇乜太多明星級球員,而佢會繼續會喺呢場波嘅邊路發威,對愛華頓資深右閘史密斯高文造成極大壓力,不過愛華頓兩大防中應該頂得住水晶宮嘅攻勢,始終水晶宮嘅進攻球員例如阿丘等等嘅進攻能力不太強。

水晶宮另一搶眼進攻球員唐辛(踢過紐記一季^^)嘅出波都有一定威脅,不過愛華頓自從買咗左閘迪尼之後似乎喺左路嘅防守方面都安枕無憂。占士洛迪古斯嘅加盟簡直激活左成對波嘅進攻,只要James一攞波,所有其他隊友都好肯向前走位,因為知道James哥可以比到啲獨到靚波。論質數,論入球能力,防守力,愛華頓都佔優,編者估愛華頓再次凱旋而歸。

Man to Watch:James Rodriguez
賽果預測:1 比 3 (愛華頓勝)

西布朗 VS 車路士

短評: 西布朗嘅近況認真麻麻,兩場英超都輸三球或以上,雖然喺啱啱嘅周中聯賽杯和左英冠嘅球隊賓福特,幫西布朗止一止血,不過返番嚟英超面對住車路士,恐怕頹勢會依然繼續。

雖然車路士上場對高半班嘅利物浦輸咗二比零(上次編者已經估到問題出喺車路士後防身上,果然估中,車路士後衛基斯甸臣紅牌出場),車仔前鋒迪姆華拿都喺嗰場劣勢波中顯示到佢嘅侵略性同子彈嘅速度。周中聯賽杯對班士利大勝六球(新仔夏維斯大演帽子戲法),反映車仔進攻力強橫。左閘捷維爾復出,新加盟嘅門將文迪同後衛泰亞高施華亦都摩拳擦掌,林柏特有機會喺今場就會派遣呢三位球員上陣,解決後防不穩問題。車仔後防穩,火力猛,面對後防穿窿嘅西布朗,睇怕都係一場入球Show。

Man to Watch:Timo Werner
賽果預測:0 比 4  (車路士勝)