《球迷世界》英超 Week 3 賽前預測! (週日/一賽事)

撰文之時,車仔 30 分鐘已經輸緊 0-3 比西布朗,請問有誰人可以估到有咁嘅情況呢! 不過, 呢樣亦係足球好睇、刺激之處!

熱刺 VS 紐卡素

短評: 熱刺係首輪英超大熱之下輸比愛華頓,令不少球評家大跌眼鏡。賽後被批評進攻欠創造力(更有人估係唔係想用輸波令老細買人),但係去到第二場突然間大勝修咸頓五比二,果場波老孫更加錄得大四喜,證明返熱刺嘅進攻力絕對不容忽視。

紐卡素方面,上輪輸比白禮頓三球,大挫士氣,進攻完全缺乏組織(我呢個紐記迷睇到想熄電視),令到第一場贏韋斯咸所營造出嘅一番新氣象(今季老細終於肯買人同埋改變轉會政策)瞬間破滅。

紐卡素上季嘅防守不俗,不過上季嘅正選門將杜巴卡缺陣,多多少少影響防守表現。今場波嘅關鍵係紐卡素會唔會採用防守戰術,同埋會唔會喺頭20分鐘就輸波。戰術上,如果紐卡素採取防守,有機會頂得住熱刺嘅進攻(上季紐卡素係英超失波較少嘅球隊之一)。

而以往紐卡素係先失波嘅情況之下,往往士氣大跌同冇能力追番。買開波嘅朋友,不妨留意下出場陣容,如果紐卡素主守,則有力摸和熱刺。

Man to Watch:Son Heung Min
賽果預測:1 比 1

曼城 VS 李斯特城

短評: 曼城喺近10次主場當中,錄得九勝一和。而李斯特城係英超亦都連贏兩場,而且以兩球以上贏對手,攻力不俗。近8次對賽當中,曼城錄得五勝,明顯佔優。

傷兵方面,前鋒阿古路及耶穌仔都受傷,突然鬧前鋒荒。不過,曼城方面係中前場不同位置都有人能夠擔任入波嘅重任,例如迪布尼同埋史達寧。早前,曼城領隊哥迪奧拿提及佢喺今仗只係得13個”senior player”可以出場(唔知係唔係心理戰術)。如果係真嘅話,都幾令人擔心!

李斯特城方面,防守球員尼迪迪同埋皮里拉亦因傷缺陣,面對曼城咁猛嘅進攻火力,可能會頂唔住。

近況方面,曼城輕鬆贏咗狼隊,而李斯特城就連續兩場大勝對手,而家喺積分榜排行第一,似乎兩隊嘅近況都係好強。兩對唯一嘅勝負差野,就係曼城嘅球員級數普遍高過李斯特城,所以曼城始終睇高一線。

Man to Watch:Kevin De Bruyne
賽果預測:3 比 1 (曼城 勝)

利物浦 VS 阿仙奴

短評: 今個禮拜最矚目嘅賽事—利物浦大戰阿仙奴!近況方面,兩隊都保持強勢。主場嘅利物浦近五場四勝一和,而阿仙奴近四場就三勝一和。不過細心留意嘅話,利物浦贏嘅都係攻力較強嘅球隊例如車路士同埋列斯聯,而對着較弱嘅球隊則可以狂數對手(例如喺聯賽杯對林肯城大數對手七比二)。以阿仙奴喺英超對嘅球隊都唔算太強嘅球隊。

兩隊都有不少傷兵,而利物浦就有隊長軒達臣受傷未能上陣,好彩新加盟嘅中場艾簡達拿正可以頂替軒達臣嘅位置,都叫做對球隊嘅完整性冇太大嘅影響. 而阿仙奴方面,有不少後防球員未能上陣,可能會增加對後防嘅隱憂。阿仙奴嘅利基迪亞同埋內爾斯嘅表現都唔錯,比到球迷對前景有唔少希望。

不過,阿仙奴嘅隱憂喺中場薩卡同埋後衛大衛雷斯身上,始終喺呢啲對利物浦嘅大賽上面,一個錯誤已經足以致命。

兩隊嘅實力都非常接近,估計利物浦會以一球之差勝出呢場賽事。

Man to Watch:Thiago Alcantara
賽果預測:2 比 1  (利物浦  勝)