《球迷世界》英超 Week 4 賽前預測! (週日/一賽事)

狼隊 VS 富咸

短評: 自從狼隊升上英超之後,為大家帶來不少驚喜。不過近三場賽事全敗,有少少令人估唔到。富咸方面,近況奇差(連續三場英超輸晒,排在榜末,不少人已經估富咸今年降硬班)有英國博彩公司已經將買咗富咸降班嘅飛派彩。

兩隊嘅受傷情況唔嚴重,狼隊喺賣走JOTA之後及加上受傷情況,喺左路方面較弱。

不過狼隊始終都係喺英超嘅中上游隊伍,實力有保證。而富咸有前冇後嘅踢法(唔識得收放自如),會令前面入幾多波後邊失返幾多球。

呢場波應該都會有不少入球,同埋兩隊都崇尚兩翼出波嘅踢法會令今場有不少角球機會。

Man to Watch:Adama Traore
賽果預測:4 比 2 (狼隊 勝)

曼聯 VS 熱刺

短評: 上場曼聯對白禮頓,睇到曼聯球迷心碎,曼聯防線比到白禮頓太多機會,白禮頓創出同場最多中柱嘅數據,如果唔係好彩嘅話,曼聯呢場波應該輸咗五六球。熱刺上場對紐卡素,上半場都踢得幾好,不過孫興民下半場換出之後,完全變咗另一隊波。

曼聯嘅關鍵係究竟後防會唔會再有失誤,同埋中場嘅創造力及有冇犯錯。孫興民要喺賽前接受體測睇吓有冇機會出到場,出唔出到對熱刺來講係好大嘅關鍵。

兩隊波都非常之想勝出呢場比賽(兩位領隊已經喺賽前展開左激烈嘅口水戰),不過要真係贏出比賽就唔係咁容易,因為實力都好接近。如果孫興民在陣,熱刺有啲機會會勝出。值得一搏!

Man to Watch:Son Heung-Min
賽果預測:1 比 1

阿士東維拉 VS 利物浦

短評: 主場嘅阿士東維拉錄得聯賽兩連勝,近況甚佳。不過對嘅球隊都係弱旅。而利物浦近況亦大好,三戰全勝(更包括車路士同阿仙奴)。

牌面上利物浦超晒班,對住車路士同阿仙奴都贏兩球,而利物浦球員亦開始入局,照計呢場都係一場大勝。

不過,最大變數係新冠肺炎,執筆之時,中場艾簡達拿及翼鋒文尼相繼確診,球員間咁多接觸,難免去到禮拜一嘅時候有更多球員確診,到時個出場陣容都唔知會係點。無論如何,以利物浦嘅板凳深度,都足以贏出呢場賽事。

Man to Watch:Jota
賽果預測:0 比 2  (利物浦  勝)