《球迷世界》英超 Week 6 賽前預測! (週日/一賽事)

狼隊 VS 紐卡素

短評: 狼隊自從買走邊鋒祖達之後,缺少咗呢兩年喺進攻方面嘅銳利。所以佢喺英超贏嗰三場,對手都係升班馬嘅球隊。紐卡素啱啱輸咗比曼聯四比一,近況上狼隊稍勝一籌。

紐卡素最大問題係中場中嘅球員速度太慢,去到比賽尾段經常唔夠體力去追波。面對狼隊嘅快速及體力化打法,紐卡素未必能應付。

賽果預測:2 比 0 (狼隊 勝)

Man to Watch:Adama Traore

阿仙奴 VS 李斯特城

短評:李斯特城頭三場英超係威係勢每場都大勝球隊兩球或以上(甚至大勝曼城五比二)。無端端近兩場又輸番比實力一般嘅對手,表現嘅穩定性成疑。阿仙奴嘅近況唔算特別好,雖然係歐霸盃勝出,叫做攞返少少信心,但喺英超面對曼城及利物浦呢啲強隊都係要輸。

李斯特城前鋒華迪有啲傷未必能趕及今場上陣,如果係咁嘅話對李斯特城有好大打擊。阿仙奴都有韋利安同埋施巴路斯可能未能上陣,不過大部份主力都能夠出戰。奧巴美揚自從戴上隊長臂章之後,表現越踢越好。

講實力,阿仙奴較為佔優。呢場第五位之爭,阿仙奴贏出嘅機會比較大。

賽果預測:2 比 1 (阿仙奴 勝)

Man to Watch:Pierre Aubameyang

般尼  VS  熱刺

短評: 熱刺上場對韋斯咸上半場早段已經拉開到三比零,可惜之後開始放軟手腳,更加喺後段換走熱刺進攻核心孫興民(其實同換入巴里嘅關係唔係好大),熱刺即刻變咗另一對波(有啲似之前對被紐卡素逼和嘅果場波,孫興民喺半場受傷被換出)。

呢場波只要孫興民在陣,照道理都可以大勝實力較弱嘅對手。睇返般尼嘅往績,認真一般,就算對實力較弱球隊例如修咸頓、紐卡素及西布朗都未能獲勝,可想而知對住熱刺唔輸多過兩球已經算執返身彩。

對般尼嚟講,子華神話齋,輸淨少少,都當係贏。

賽果預測:0 比 3  (熱刺  勝)

Man to Watch:Son Heung Min