《球迷世界》英超 Week 7 賽前預測! (週六賽事)

上週week 7 Prediction 結果

韋斯咸  VS  曼城
賽果預測:1 比 3 (曼城 勝)
結果:1 比 1

曼聯 VS 車路士
賽果預測:2 比 2
結果:0 比 0

利物浦 VS 錫菲聯
賽果預測:3 比 0  (利物浦  勝)
結果:2 比 1

狼隊   VS  紐卡素
賽果預測:2 比 0 (狼隊 勝)
結果:1 比 1

阿仙奴 VS 李斯特城
賽果預測:2 比 1 (阿仙奴 勝)
結果:0 比 1

般尼  VS  熱刺
賽果預測:0 比 3  (熱刺  勝)
結果:0 比 1

編按:今季估波,曼城多次令我失望。好多強隊都有失分,望吓英超聯賽榜頭五位,好多Big Six球隊都唔見影,真係令人難以置信(不過呢個亦係英超好睇之處,冇其他聯賽咁悶,某一兩隊波由頭帶到落尾)。 如果要估波更加準,要即場分析有邊啲球員出唔到,同埋睇吓出唔到嘅球員係唔係球隊嘅關鍵主力,如果係關鍵主力嘅話,替代佢嘅後備球員同佢嘅質素相差有幾遠,都可以幫讀者更準確預測球賽結果。

錫菲聯 VS  曼城

短評: 錫菲聯嘅近況認真差勁,咁耐只係和個富咸一場拎一分。好彩近呢三場英超都叫每場有波入,齋睇表現,球隊充滿幹勁。不過,進攻嘅組織同質素就只係平平。

曼城今季喺英超表現冇之前咁銳利,同缺乏前鋒有莫大關係。上場和咗韋斯咸都令人大跌眼鏡,韋斯咸近幾場表現提升活力十足,都令曼城難以攻克。好彩歐聯贏咗馬賽,幫助球隊提升少少士氣,但係缺乏前鋒嘅問題(可能11月中後期先可能有機會復出)都會令曼城幾頭痛。

賽果預測:0 比 1 (曼城 勝)

Man to Watch:Sterling


般尼  VS 車路士

短評:般尼嘅近況差到離晒譜,咁耐以來只係和過西布朗一場。車路士近況較優,不過始終成日都唔能夠喺比賽奠定勝局。

車路士上年喺買賣球員禁令之下反而踢得比今年好,今年大灑金錢之下林柏特反而做唔到好成績,有人開始擔心佢嘅帥位不保。車路士嘅主要問題係進攻力一流,防守九流,喺之前嘅英超對西布朗同修咸頓,兩場都失足三球。

慶幸嘅係,車路士嘅新血開始慢慢適應及融入球隊,例如前鋒添姆華拿已經開始為球隊帶嚟入球。

兩隊實力懸殊,近況亦好大分別,車路士能夠輕鬆勝出。

賽果預測:2 比 4  (車路士 勝)

Man to Watch:Ziyech

利物浦 VS 韋斯咸

短評: 繼利物浦後衛雲迪克重創後,連替工法賓奴都傷埋,真係屋漏兼逢連夜雨。

韋斯咸方面,進攻主力安東尼奧受傷六個星期,對韋斯咸造成沉重打擊。

利物浦自從冇咗雲迪克之後各項賽事連勝三場,表面上好似冇乜太大影響,但係後防感覺變得脆弱。韋斯咸狀態甚佳,近四場英超錄得兩勝兩和,擺脫季初聯賽嘅弱勢,亦反映領隊莫耶斯有一定調兵遣將嘅實力。雖然利物浦後防不穩,但係面對利記強勁嘅中前場實力,韋斯咸難以抵擋。不過以韋斯咸嘅韌力,利物浦未必能夠贏得好輕鬆。

賽果預測:2 比 1  (利物浦  勝)

Man to Watch:Thiago