《球迷世界》英超 Week 11 賽前預測! (週六至日賽事)

上週week 10 Prediction 結果

白禮頓  VS  利物浦
賽果預測:1 比 3 (利物浦 勝)
結果:1 比 1

愛華頓 VS 列斯聯
賽果預測:3 比 2  (愛華頓 勝)
結果:0 比 1

車路士  VS  熱刺
賽果預測:3 比 2 (車路士 勝)
結果:0 比 0

阿仙奴    VS  狼隊
賽果預測:1 比 1
結果:1 比 2

李斯特城 VS 富咸
賽果預測:3 比 0  (李斯特城  勝)
結果:1 比 2

般尼  VS  愛華頓

短評:呢場波喺免費台99號有得播。般尼上次對住曼城錄得一場慘敗,上半場已經輸三粒,最後埋單輸五球,相信對士氣有好大影響。(不過可能同出咗後備門將有關)愛華頓嘅近況就麻麻哋囉,近五場波輸咗四場,兩個閘位繼續受傷,加上進攻核心J洛受傷之後表現未能返返去季初水平,都大大影響着愛華頓嘅表現。

愛華頓呢場需要小心對住般尼嘅體力化踢法,面對着前鋒基斯活特同埋洛迪古斯,咁大份撞埋嚟,愛華頓嘅後衛,特別係新仔葛飛唔知頂唔頂得着。

不過慶幸嘅係般尼嘅邊路速度唔算快,愛華頓冇咗兩閘嘅影響都唔算太嚴重。如果愛華頓嘅前線火力能夠保持,相信愛華頓可以小勝般尼。

賽果預測:0 比 1 (愛華頓 勝)

Man to Watch:Richarlison


韋斯咸  VS  曼聯

短評:韋斯咸同曼聯喺英超嘅近況都相當不俗,同時都連勝四場。韋斯咸越踢越順排名升到第五位,更加衝擊近20年來球隊喺英超嘅最高分數(頭10場)。曼聯方面,本身上半場輸緊比修咸頓二比零,下半場出咗卡雲尼之後係補時階段反勝,唔知係咪幫助激活咗卡雲尼同埋曼聯嘅入球把握力?

如果曼聯肯出卡雲尼同埋雲迪碧克,可能有啲機會贏到韋斯咸(不過相信蘇B唔會咁做)。但係基於韋斯咸嘅近況不俗,所以兩隊打和機會較大。

賽果預測:2 比 2

Man to Watch:Cavani (後備殺手)

車路士  VS  列斯聯

短評:呢場會係一場娛樂性好豐富,有不少進攻及射門場面嘅比賽。車路士近況超班,已經喺各場賽事保持連勝(係上場英超對熱刺和左),加上前鋒基奧特喺周中嘅歐聯分組賽錄得大四喜,證明仍擁有不俗嘅入球能力,呢場轉任正選中鋒亦唔好覺得出奇。

列斯聯方面上場憑夏芬拿嘅冷箭奠定勝局,有助提升士氣,而且球隊慢慢適應英超踢法。睇返列斯聯嘅戰績試過喺主場和左曼城同阿仙奴呢啲強隊,亦會輸比水晶宮同李斯特城四比一,結果好難預計,主要原因係列斯聯對住乜嘢球隊,都採用進攻踢法,呢樣亦都係佢哋嘅比賽吸引之處同特點。不過如果論質素同近況,車路士都優勝過列斯聯一段距離。

賽果預測:3 比 2 (車路士 勝)

Man to Watch:Timo Werner

熱刺   VS   阿仙奴

短評:本週英超嘅重頭戲,倫敦打吡——熱刺對阿仙奴!以前來講,呢兩場波嘅對碰係一場好緊湊刺激嘅比賽,不過睇返積分榜嘅排位……真係有天淵之別,對阿仙奴嘅球迷來講更加係感到嘆息。兩隊波近六次嘅對碰,熱刺贏三場,阿記贏一場,而熱刺已經喺主場五次對阿仙奴錄得不敗嘅紀錄。

近況方面,熱刺已經近九場英超不敗,摩連奴都唔想記錄斷纜,而前鋒簡尼同埋孫興民嘅入球組合,令不少球隊聞風喪膽。

雖然阿仙奴喺歐霸嘅賽事,以四比一大勝維也納迅速,但之前我嘅預測都講過英超隊喺歐洲賽嘅表現係非常之好,但係返返英超之後就難踢好多。睇返阿仙奴喺英超嘅成績,始終都有不穩定嘅情況,似乎未必阻到熱刺取得3分。

賽果預測:2 比 1 (熱刺 勝)

Man to Watch:Kane

利物浦  VS  狼隊

短評:兩對波嘅近況都唔錯,狼隊喺積分榜度只係落後利物浦4分

睇返個受傷名單,利物浦嘅十字軍真係多到你唔信,我諗高普都要搵風水師傅睇睇訓練場有咩問題。而狼隊方面,前鋒Jimenez受傷,球隊並冇其他嘅替代人選;相反,對面嘅利物浦,倒戈嘅迪亞高祖達好希望今場可以正選上陣,此子嘅狀態甚佳,八場入八球,證明高普冇買錯人。

雖然,狼隊以往對親Big Six嘅球隊都有不錯嘅表現,但係今年嘅狼隊已經不同以往,冇咗以前嘅銳利度。基於狼隊嘅火力被削弱,面對着利物浦嘅銳利進攻線,應該難以抵擋。

賽果預測:2 比 1  (利物浦  勝)

Man to Watch:Jota