《球迷世界》英超 (6-8/2/21) 賽前預測!

阿士東維拉  VS  阿仙奴


短評:阿士東維拉嘅近況唔係太穩定,早兩場先啱啱贏咗修咸頓,以為表現有啲起色,卻之後又大敗比韋斯咸三比一,有點令人洩氣。而阿仙奴方面,本身表現越來越穩定,亦都慢慢踢翻阿仙奴應有嘅水準,本身係聯賽已經有七場不敗,點知上一場對住狼隊,喺九人應戰之下落敗,令人失望。

雖然阿仙奴有前鋒奧巴美揚重返正選陣容,但係佢哋後防充滿隱憂,大衛雷絲同埋門將利奴上一場因為紅牌而需要喺今場停賽,而第二門將馬非賴恩亦可能缺陣,需要出到3號門將,而諷刺嘅係,上年阿仙奴後備門將馬天尼斯今場倒戈上陣,相信不少阿仙奴球迷都會感觸良多。

基於阿士東維拉表現不穩,同時阿仙奴亦有號房隱憂,相信兩隊都會握手言和。

賽果預測:2 比 2  

Man to Watch:Emile Smith Rowe

紐卡素   VS   修咸頓

短評:千呼萬喚始出來,紐卡素明星級翼鋒辛麥斯文喺呢場終於有機會以正選上陣(之前受到新冠病毒感染而缺陣兩個幾月),將會大大加強紐卡素嘅攻擊力同埋創造力!而對面嘅修咸頓啱啱輸咗比曼聯九比零!大大打擊球隊士氣,加上傷兵滿營,似乎對紐卡素取勝係一個好好嘅機會。

不過又咁睇,球隊係羞辱性嘅大敗之後,下一場表現多數會有進步,加上球隊主力多數能夠上陣,而修咸頓中場禾特包斯同埋前鋒丹尼京斯嘅創造力同埋火力不足,對於紐卡素又出現後防缺人嘅情況下,始終有機會為修咸頓製造入球。

賽果預測:2 比 2

Man to Watch:Allan Saint-Maximin


曼聯    VS   愛華頓

短評: 曼聯剛剛大勝修咸頓九比零,球隊士氣大振,亦反映曼聯早前輸比修咸頓一比零之後,球隊表現反彈,再次回復正軌!球隊亦都冇明顯傷兵問題,接近全隊主力球員都能夠上陣,可以用100%實力來迎戰。

愛華頓早前爆冷輸咗比紐卡素之後,亦都有少少爆冷贏到列斯聯,再加上該場賽事幫助前鋒卡法路雲打破小入球荒,對球隊影響正面。

不過面對重拾正軌嘅曼聯,愛華頓難以作客喺奧脫福球場取得分數。

賽果預測:3 比 1 (曼聯 勝)

Man to Watch:Bruno Fernandes

狼隊    VS   李斯特城

短評:狼隊上一場僥倖贏咗阿仙奴二比一(受惠於阿仙奴兩面紅牌),迎來球隊自聖誕節後首場聯賽勝利。而李斯特城方面,上一場喺前鋒華迪缺陣之下,仍然能夠以二比零贏富咸,協助球隊重拾勝鼓。

基於狼隊表現繼續低迷(入球重心魯爾占美利斯繼續受傷),而李斯特城今季嘅作客成績係全英超排第二( 11場當中贏咗8 場),相信喺華迪歸隊嘅呢場賽事當中會繼續以勝利嘅方式去追逐佢哋嘅前四夢。

賽果預測:0 比 2 (李斯特城 勝)

Man to Watch:Jamie Vardy

利物浦   VS  曼城

短評:利物浦自從創出喺晏菲路球場連續68場聯賽不敗嘅記錄之後,相繼喺主場輸咗比般尼同埋白禮頓!呢隊聖誕冠軍如果今場波再輸埋,將會落後榜首嘅曼城10分。

之前都講過,嚴重嘅後防傷兵問題開頭好似對利物浦影響不大,但係長遠嘅影響開始浮現。領隊高普喺冬季轉會窗裏面引入左兩位後防球員,心裏面可能都忐忑緊喺今場波究竟會唔會放返軒達臣去中場位置去彌補組織及創造力不足嘅問題。

曼城方面氣勢如虹(曼城對上一場輸波已經去到11月中),雖然都有迪布尼同埋阿古路未能上陣,但係對於曼城嘅陣容影響唔算非常大。

賽果預測:0 比 2 (曼城 勝)

Man to Watch:Phil Foden